ASF vanga vawk thi te zangnadawmna chhungkaw 12160 hnenah pe tawh

by News Editor

Tualchhung News

ZORAM TODAY| 18th July, 2024 (Thursday): Animal Husbandry & Veterinary Department in RTI Act hmanga zawhna a chhan danin MNF sorkar lai, kum 2021 khan vawk pul hri, African Swine Fever (ASF) vanga vawk an suat te hnenah zangnadawmna chhungkaw 12160 hnenah pek an ni, a ti.

ASF vanga vawk chânte tan hian Mizoram sorkar chuan central sorkar ah puihna a dil a, dan ding lai awmsa, Assistance to State for Animal Disaster (ADCAD) hmangin zangnadawmna dil chhuah a ni.

Mizoram sorkar leh Central sorkar chuan 50:50 a sum in tum sem in ₹.11,69,94,414/- zet ASF vanga vawk thite tan sen ral a ni.

Sorkar laipui dan ding lai angin vawk thi te zangnadawmna an pek dan chu- kg 15 hnuai lam tan ₹. 2,200; kg 15-40 tan ₹. 5,800; kg 40-70 tan ₹. 8,400; kg 70-100 tan ₹. 12,000 leh kg 100 chung lam tan ₹. 15,000 a ni.

Kumin 2024 bik ah, July ni 9 thleng khan Mizoramah ASF vanga vawk thi 5321 a awm leh tawh niin AH & Vety department chuan a chhinchhiah.

Heng vawk thi te hi Mizoram sorkarin zangnadawmna a la pe lo thung a, kum 2024 a vawk thi te, June 2024 thla chin atan chhawmdawlna tur central sorkarah dil sak mek an nih thu, RTI hmanga zawhna department chuan a chhang.

( Picture: Vawk chânte tan zangnadawmna sem chhuah lai)